Osnovna škola "Grohote" Grohote

Najlipja plaža na Malom Drveniku je Mala rina i  po njoj smo se mi dica nazvali mala banda. Nismo mi banditi. Mi smo samo dica ča dikod barufe činimo i dikod u lupeštinu gremo jerbo susid uvik jema boje praske. Ma ne jididu se stari na nas. Dikod bokun zaviču pa kad vidu da ih ne obadajemo, fermaju i oni. Ne karamo  se i ne tučemo. Dikod se ko štica, ali i to projde pa  opet bude cila mala banda. Ako  koga nima, fali nan. Svako jutro gremo na more. Skačemo, barufe činimo, vičemo da nas cili otok čuje.

A kad se navečer najdemo, nastane vika, skrikanje,skakanje, vatanje, kukala  se igramo da judi ne mogu zaspat od nas. Ujutro opet gremo na more i slušamo kako stari judi (a među njima i moj nono) beštimaju:"Ča si baca mriže priko mojega  sinjala? Al  si ćorav pa nisi vidija da je to bija moj sinjal?" dere se šjor Ivan na šjora Bartula."Pa nisan ti ja kriv ča si ti vidija kako ja planiran di ću kalat mriže",odgovara šjor Bartulo. Njih smo prozvali "vijećen mudraca" zato ča po cile dane mudruju nama dici... Najviše nan idu na živce babe koje svaki dan ponavljaju isto ka papige:"Ajme, dite moje, priladit ćeš mi se, još samo fali da mi upalu pluća uvatiš! "Ipak, nisu ni one tako loše jer svaku večer nečija baba napravi palačinke ili nan da neke  gulozarije. A kako tek rade pitu o prasak, pa nas još i udebljaju priko lita. Ranimo se mi na sokove, ribu ali nan je najdraže svaki dan izist neki dobar voćni sladoled. 

          Jednoga lipoga jutra bilo nan je dosadno pa smo došli na ideju da učinimo neku barufu za kraj lita. Dosta nan je bilo 3 metra konopa i neki  stari čovik. Zavezali smo konop za stup i za kontejner taman prije nego šta je vapor ariva.

"Ajme, judi, gledajte, evo gluvi Bože! Sad kad bude zapea za konop", reka je Unikat (naš prijatej), a mi smo  odvratili:"Ala smija sad kad ne bude vidija konop i ne bude moga proć!"

Stari Bože nije moga proć. Bože poludija a mi u more pali o smija. Moj  nono mu je pomoga pa nan je kasnije, skupa s mudracima, održa predavanje. Boži smo se  tribali ispričat i to smo učinili, a on nan nije ni zamirija jerbo je i on nekad bija dite.

         Straj   me da će sve ovo brzo proć, da ćemo narest i znan da ću onda gledat drugu dicu i pitat se jemaju li i oni svoju malu bandu. Mi smo dica koja vole i koja se brinu za ovaj otok. Ne damo  da taj otok bude moderniziran jer nima  lipjega otoka na ovomen svitu ka ča je Mali Drvenik.