Osnovna škola "Grohote" Grohote

Jemo je pet ćer i kal mu je žena rojala šesti put uteko je u goru da mu u lavuru lašnje vrime paso. U niko doba došli su mu reć da se rodilo, a on je već izdaleka odoćo da ni vele alegrije, po je zaviko: „Znon, znon ča je, ni potriba da mi govorite! Ali, Bog ga je nadori sa ćerami, sve kojo ol koje lipjo i vridnijo. Lavurale su i pomogale ništa manje nego da su muški.

Njegov kunjod jemo je pet sinov i kalgod je mogo gledo mu je inbrokat da on nimo niednega i da ga nimo ko naslidit. Bi je š njin u mejošu i ni baš bi za zaletit se za poslon. Tako je franono jedon don oro u gori. Uprlo sunce. On za plugon, muči se. Potidu se nono i mazga, a njegov kunjod došo sa kozon u pašu, sê u hlod i zanamisto da mu pomože, svako malo reče: 

„A nevojo, ma za koga se mučiš?“

Nono muči i ore, ali mu kuho ča ga vi zafrkoje. Duralo to vrimena, ma onda mojen storen nonotu dogundilo po zavapi: „De, bera! Za zete!“

Bi je puno pobožan. Voli je hodit u crikvu i pivot. Cilo se crikva orila i judi su inkantono slušoli kal bi nono svojin dubokin gloson zapivo  „Rajska djevo, kraljice Hrvata.“

Ni bi puno grintav, ali mu se isto zno dignut kenjac, pogotovo kal ga ne bidu slušola dica ili mazga. Znala mu je uteć i kojo, Bože oprosti, beštima.

Ispovido se pril Božić i za Uskrs i ni bilo lako ostat bez griha ol ispovidi do funciuna. Ajde, za Božić je bilo lašnje izdurat, somo jedon don. Ma za Uskrs, to je bila muka Isusova. Vajalo je ne beštimat cilu velu šetemonu, ol subote pri nedije ol polme po sve do Uskrsa.

Subota pri Uskrsa. Nono naprti Beru i da će puldoma, a ona stoji na mistu. Ukopala se i ne bi se pomakla da je ubiješ.

Provoje nono na lipe: „Ajde, Bera! De!“

Po onda žešće: „De, Bera!..... De, Bera, dabojdo ti…… uh…….  De, Bera!!!“

Onda stane, nasmiho se som sebi, pogledo Beru i zaviče: „ De, Bera, još danas!“

Antea Jerčić, 7. razred

Mentor: Maja Ćapin

OŠ Pučišća, Pučišća