Osnovna škola "Grohote" Grohote

Tako je bilo i ni put, usodi je petnest kili kumpirih. Kal hi je duošlo vrime iskopat, iskopo je njonka piet kili, a svaki kumpir ko frenja. Nã po duoca je frmo, pogledo u nebo, peto roge i reko Mu: „Hmmm, lako ti je vako bit Buog!“

Ča  mislite da je lako odgojit  luozje,  ni malo ni vele. Da vi vidite kojo je to muka i pokora.

Kal čovik hoće usodit loze nojpri va da uzmaškino ziemju i usodi divje pruće. Onda ga pusti da zene i stopr drugo godišće navrne plienke, kojie se čuvo ko oči u glovi da ne duojde beštija i da hi ne potuče. Dokle ne duojdedu nã rod va hi kopat, okutlovat, zagrćot, polpirot i veživat. Posli hi va rizot, nojveće nã dvo brka, šćipat, sumparovat i polivat vidrijuolon da hi ne napode pronošpera i lug.

Muoj nuono je imo luozje u Lukami i puno se kolo njega muči, uon i dica. Ko Boga se čekolo da gruozje zasuri i stolo atiento da ga ne izidu tići, ose i drugo gamod. Bilo je i inguordih turistih koji bidu se dolibili kal nuono ne gledo i mošili za koji grozdić. Kal bi nuono posli vidi da su mu kidoli gruozje činilo bi mu se ko da su mu komadiće tila olkinuli. Toliko mu je bilo tieško da je jedon put uze pušku i don i nuoć čini strožu da ne duojdedu turisti u kreju.

Pasoje lito, zojni su mu skonsi. Urodilo gruozje i nuono ga već vidi u badnju, ne miče se iz gorie i čeko da puočne trganja. Jednu večer, pri nego će puoć leć, sto ispril kućice, gledo u nebo i učinilo mu se ko da će nikuo duonje vrime. Vas se ustrieso kal je ćuti dvi kapje na ćeli. Od muke je ulizo u kućicu i govori ženi: „Ma, a će vo neviera?“ „Ni zla, ni zla“, govori žena somo da ga smiri i puošme molit, svietu Boru i svietega Mikulu zazivat: „Svieto Bore pobaruj, svieti Miko pomiluj“… Ma ni pasalo ni kvarat od ure, počelo grmit, lampat, dažit, a onda, judi moji, grod, grod.

To ni puno duralo, ma je bilo dosta da potuče cili nuonotov trud i muku. Kal je nevrime frmalo, bidan nuono išo vidit kolika je šćeta, vas jidan nã Boga ča mu je to učini. U to zalampalo!

Nuono pun jida i bisa pogledo gori u nebo i zaviče: „Posvitli, posvitli da vidiš je Ti čo ostalo!“

Petar Novaković, 7. razred

Mentor: Maja Ćapin

OŠ Pučišća, Pučišća