Osnovna škola "Grohote" Grohote

  Kako bilo da bilo, sal su na Broču i činidu šćetu!

Jelno godišće urodile masline, a kal su već urodile, ried hi je i pobrat!

- Sramota je ol Boga i ol svita ostavit hi na stablu,  Buog bi nas kaštigo – rekla je nona.

- Ala dobro je - reko je nuono - frmojmo provjat, u subotu se va parićat i brat!

Večer pri kupili smo kobasic i brižuolih, a nona je zažutila kapuca. Pri je bi običaj odnit suhih smokov, ali ko će hi sal dat kal hi nikor ne suši, po smo kupili "domaćicih" i mandarinih za posli mariende. Dobro se gledolo da se ne zaboravidu gradele i vino, a i voda - jer  va učinit bevondu, cilo vino zamanto.

 Ma, kakovo će  vrime?

Govori je pokojan Baška, kal ga je niki furešti pito je u nos uvik sunca, da ne zno tašno reć, ali zno da svaku slobodnu subotu pado dož!

 I ča ću van govorit, tako je bilo i tu subotu. Izutra se na vrime diglo. Ni svak bi zadovojan ča ga se probudilo i mrnjalo se naveliko, ali nuono je reko da se grie i zaludu je bilo govorit da će do koju uru nebo na zemju. Vazele su se lumbrele i incerode, obulo se dobru obuću i selo u auta, kal - nikor se obado:

- A saketi, zaboravili smo sakete,  u što ćemo brat!?

Nuono se vas iznervožito:

- U žepe, u žepe! - zavapi je. Nona se na to iskrcala i ulizla u kuću iškat sakete, a mi smo čekoli i gledoli u nebo.

Mater je rekla da je bilo boje ostat doma, da ćemo se  smočit i ćapat plavuritu.

Nuonotu je još somo to falilo!

 - Nojboje bi bilo da svi sedemo u Dragana u kafić, tamo će nan  bit lipo teplo i  niećemo se smočit! A  masline ćedu nan pobrat tice nebeske! - pini je bisno.

 U to je duošla nona sa saketima, a nuono se i prima njuon ispieči:

- Vrag odni prišu! -  i pomalo smo se uputili.

Kad smo duošli u Grabovac, počeli smo iskrcovat sve ča smo donili, a nuono je prvi ulizo u ogradu.

Ujedonput  smo ga čuli kako viče i svi smo se zaletili vidit če. Imali smo čo i vidit:

Zemja ispol maslin bila je sva izrovona, propja su se konoli učinili tako da nisi mogo ninder stat, a da si na rovno. Nuono je poče mohat rukami, zacrvenile su mu se uši, vas se užgo:

- Če vo sada, če vo sada, još ste mi somo vi falili! Gledojte ča su mi divji projci učinili!

U to je grunu ohlip i svi smo utekli u kućicu i naložili ogonj. Nikor je reko da je nojboje da sal izimo, da ne dangubimo, po smo izvukli gradele i mieso i učinili mariendu. Nuono je izi, popi bevondu, a onda je pametno zakjuči:

- Po znoš čo, dobro su i učinili! Kal jo nison uzoro masline, neka su hi projci uzorali!

Svi smo se počeli smijat, a onda smo zapivoli.

Masline smo pobroli drugu subotu i niećete virovot - bilo je zasjalo  sunce.  

Pino Vrandečić, 4. razred

Mentor: Željka Martinić

OŠ Pučišća, Pučišća