preskoči na sadržaj

Osnovna škola "Grohote" Grohote

Dječji Pričigin 2013. - priče

Vapor: Josipa Vukić_Dječji Pričigin 2013

Autor: Dragana Đurić, 24. 3. 2013.

Život na škoju voli Josipa Vukić, 8.razred OŠ Petar Berislavić, kojoj je meštrovica Slavica Rožić. Josipa zna ča je za škoj važno - Vapor

Željka Alajbeg, voditelj GKMM Knjižnice Grohote

 

 

VAPOR

 

          Kraj je šetemane. Bati deseta ura. Ukrcajen se na vapor, dajen noštromu kartu, najden misto za sist i čekan da partimo. Odmolaju se cime, barba daje u šiju i partenca.

          Dica trčidu po salonu, matere za njima viču: "Dite, ubit ćeš se! Koliko put ti moran reć da sidneš, di si poletija?" Nismo vengo partili, moramo se opet fermat. U Seget se krcadu auti i kamioni za Mali i Veli Drvenik. To dikod traje i po tri kvarta od ure. Vaporon se na otok pribaciju cimenat, žalo, blokete, matuni i sve ča judima triba za napravit bokunić vikendice. Tod se krca i kamion o škovac, dva puta na šetemanu. Priko zime ga nije toliko loše trevit, ali liti, svitu moj, kad škovace uskuvaju, to vonja ka fonja. Kad su se svi ukrcali, diže se sprida rampa, opet u šiju, okrićemo se prima punti o Donjega Okruka i gremo. Iza škine ostaje Trogir, a provon gremo put Ploče.

         Bonaca je ka uje, a vapor ostavja bilu crtu za sobon. Asti ca je lipo danas bordižat. Na vaporu svak svakoga zna i uvik se ništo dogaja. Mlađarija se gre malo banjat, a stari svit se tornja iz likara. Najsmišnije mi je kad počnu iz saketi vadit špicalije pa zovedu: ''Mala Cvejina, nu dojdi sekund, jeman te ništo pitat!''. ''Ča van triba, teta Draga?''. ''Nu, molin te, pročitaj mi za ca mi je ovo tod. To mi je dala ona mlada likarica.'' ''Ovo su van tablete za štumik i morate jih pit ujutro, ove  za glavu isto morate pit ujutro, a ove su van da mi lipo spavate. Njih pijete uvečer posli večere.'’

            Oni zapantu po pituran koje su za ca pa, poslin svega, pitaju: "Znači, mlaja, jedna zelena i jedna bila jušto poslin galetini i mlika, a ova šarena poslin večere." Nima mi druge nego učinit mot glavon da je tako. Stariji se judi karaju: ''Ma, najlipje je imat ribu za obid pa posli obida malo bumbit bevande i ić leć'', veli cotavi Jozo. ''Ma ajde, pijanduro stara, samo na vino i rakiju misliš. Jemaš ti i ženu i dicu koje triba ranit!'' nastave se karat. Žene bokun proćakulaju: ''Moja ti ćer Marija jema dvoje dice, ma nu, vidi jih kako su mi šesni. Ovo ti je mala Kate, a ovo Špiro.'' ''Ajme, ca su šesni, a ova mala jema tvoje oči, a?''. ''Je, je. Babina lipotica!''

       Lipo na vaporu proćakulaš, nasmiješ se i najidiš, a bogami padne dikod i lipa marenda kad se iz borši počne vadit murtadela i friški kruv. Prva štacija - Veli Drvenik! Arija čudno vonja. I Pločari se dižu ka i domaći. Nastane šušur i konfužjun. Potižu se ramine i borše. Nosu se kese pune bibiti i spize, ali sve pod oštrin okon nas Pločara. Svi čuvaju svoje bagaje jerbo se onima iz Veloga dogodi da in se peta borša za ruku, ka ča se dogodilo jedan put. Moj dida je sakrija bagaje tete Tončice. I ona je, bidna, kad se iskrcavala na Ploču, sinjala da joj falidu bagaji pa udri u plač. Suza suzu goni, a moj dida krepaje o smija. Na kraju joj je pokaza di su joj bagaje pa je zaradija sladoled.

      Taman marendaš i vapor počne akoštavat u porat. A to van je gušt. Prid vapor dođu svi ca mogu odit. Sve karijole i svi traktori se skupidu vazest provištu. Pet minuti traje konfužjun, svak svakoga zove, svi govoridu u isto vrime, tiraju, potižu... Ma ludilo! I opet se odmolaje cima, barba u šiju daje i u portu ne ostane ni pasa. Ne razumin one ca bi tili ukinit ili smanjit pruge za škoje. Tamo judi žividu kad vapor akoštaje!

     I zato, judi, ne činite monade. Ne dirajte vapore jer ne znate koliko gušti jema i koliko oni značidu judiman ca žividu na škojima. A ja jopet jedva čekan petak da s vaporon gren na Ploču.

Josipa Vukić, 8. razred

Mentor: Slavica Rožić

OŠ Petar Berislavić, Trogir

 




Tražilica


Napredno pretraživanje
Traži
RASPORED SATI
ZBORNICA

Virtualna učionice

 

e-Dnevnik

 

Oglasna ploča
SIGURNOST U PROMETU
Prevencija
Safetynet

LINKOVI ZA IGRU I UČENJE
Kalendar
« Ožujak 2024 »
Po Ut Sr Če Pe Su Ne
26 27 28 29 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
1 2 3 4 5 6 7
Prikazani događaji

ZANIMLJIVOSTI
DOKUMENTI
Korisni linkovi
Brojač posjeta
Ispis statistike od 6. 4. 2011.

Ukupno: 5384946
Ovaj mjesec: 5860
Ovaj tjedan: 666
Danas: 40
CMS za škole logo
Osnovna škola "Grohote" Grohote / Podkuća 28, HR-21430 Grohote - Šolta / www.os-grohote-solta.skole.hr / ured@os-grohote-solta.skole.hr
preskoči na navigaciju