Osnovna škola "Grohote" Grohote

DIŠPETI

Ispriča bi van ništo o mojen ocu i njegovin dišpetima.

Ovo ča ću van sad reć dogodilo se kad je moj pape jema 6 godin.

Moj nono van je spava otvoreni usta, a da to ni ni zna. Moj pape poslin obida ni jema ča činit, oću reć bilo mu je dosadno pa kad je ugleda nona kako blaženo spava i hrče otvoreni usta s ispadnutin jezikon vanka palo mu je napamet da bonbon koji je jema u šaki ubaci u nonova usta. Bidan non se deboto uguši. Probudi se, zakoluta očima, uvati za grlo i proguca bonbon.

Kad je doša bokun sebi, nakon straja i šoka, proradi je bis pa je dovati oca i bum nogon u guzicu, a otac drito u more.

Eto to van je bi prvi dišpet moga oca. A nisan ni ja puno boji jerbo kad san jema 10 godin i ja san voli činit dišpete, a i danas. Jema bit da nan je to u krvi, oliti u genima.

Tako san ja našen susidu, a nadimak mu je Posrapokrivo, kad ga ni bilo za vidit ispri kuće na kvaku stavi lipilo, isprid vrat pločice namaza maslon, a na obišenu jaketu nataka udicu koja je s krenon bila povezana sićon vode.

Kad se pojavi, a mislin da je odspava u ladovini iza kuće jer je bi još sanjiv i malo smantan kreni je prema kući i dogodilo se sve kako san i smisli. Uvati je kvaku i ni moga ruku odma odlipit, noge su klizile pa je pa i razbi deboto škinu. Osta je ležat i ni se moga maknit, a kad se konačno uspi dignit potega je jaketu svon forcon jerbo je bi bisan, krena se makla i aktivirala sić s vodon pa ga okupala.

Svima i svemu je beštima i nabraja. Čula ga je cila kaleta pa i moji!

Kad san doša doma moji su doznali ča san učini. Nisu me tukli, nego su me tutnili pod ladni tuš.

Eto judi moji neka je meni i van pouka da se posli dišpeta ne vraćate odma doma, vengo pričekajte dan-dva.

Ante Koludrović, 7. razred

Mentor: Mirjana Stanić

OŠ Grohote, Grohote