Osnovna škola "Grohote" Grohote

MIŽERIJA

Puno puti, kad se nan dici obid ni sviđa i materi zagrintamo ča je to opet skuvala ča mi ne volimo, dida samo zavrti glavon i reče: ''Joj, dico moja, ne znate vi ča je glad, niste vi mižerije okusili!'' onda nan ispriča štoriju ča smo je već sto puti čuli:

Kad je on bi mali ka mi sad, ni se imalo spize obilato za svakoga nego se dililo ko je više zasluži. Najprin pape, jerbo on puno radi za cilu familiju, onda mater, a dici najmanje. Dica su bila žejna svega i na sve načine su provali privarit mater da dobiju još bokun friškega kruva, ma ni bilo koristi jerbo drugega bokuna ni bilo. Život je bi težak, a naročito na škoju. Mižerija je potirala jude po cilome svitu. Otišli su tražit boji život.

Dok nanovo slušan didovu štoriju pari mi se da je jopet došlo isto vrime. Slušan ovih dan' kako mladi judi bižidu iz Hrvajske u Kanadu, Ameriku jerbo nemadu posla, stana, šoldi…

Jo, kakova su vrimena došla? Sve će jude potirat sa škoja. A skula?! Ma da ne pripovidan! U ciloj skuli nas je šezdesetak, pa ča to ni sramota? Nema se nizašto. Eno radnicima opet smanjili plaću. A sve je poskupilo. Sad me sram pitat papu za novi mobitel, mater da mi kupi nove starke. Sram me ča nisan izila kiseli kupus kojega ne volin, a drugi bi bili sritni takvin obidon. Sram me ča nisan boje slušala didove štorije i cijenila sve ča iman. Bože moj, gruba li je ova mižerija. Nadan se da će ča prin proć i da će se judi vratit svojin domovima, a da će u mojoj skuli bit bar još ovoliko dice.

Magdalena Sinovčić, 4. razred

Mentor: Jasminka Škeva

OŠ Grohote, Grohote